إعلان


متجر مواد غذائية قرب منتجع صيفي

السلام عليكم. بعض الاعضاء طلبو مني نعطي فكرة لهاد المشروع. انا غادي نهضر على تجربة ديالي، أنا ف اول كنت خدام في الشركة ونتومة عارفين خدمة ديل شركات صعيبة شوية وديما محكوم، قررت نخرج نخدم حر ديل راسي بقيت كنخربق في التجارة بشوية بشوية مهم جاب الله واحد محال من هادو لفي صورة. كريتو مجهز وعمرتو

وعلى فكرة هاد محال متواجد في واحد منتجع سياحي الصيفي بمعنى كيخدم غير الصيف في هاداك منتجع كاين اوطيل وما يقارب 800 شقة و100 ڤيلا وكنخدم فيه الشهرين لا غير وخا كريتو لعام حيت كنت ناوي نخدم فيه عام ولكن دوك الشهرين كتكون فيها خدمة مزيان كنخلص كرا وكيشيط ليا الحمد لله شي بركة مع علم كنبيع بتمن زايد شوية حيت هو موقع سياحي وكيخدم غير شهرين والحمد لله زدت محال اخر كريتو حتا هو ولكن مكررش نفس خطأ كريتو غير اربع اشهر في سنة ودرت معاهم اكيد كونطرا ديل خمس سنوات وانا مركز على بحال هاد محلات حيت كيكونو خدامين وفيهم شوية الصرف وكنحاول نكريهم مجهزيين باش نقص عليا مصاريف.

ولكيزيد يعاوني كنتقدا سلعة ديل درب غلف راه ناس ديل كازا كيعرفوها راسي باش داك هامش لغادي يربحوه موزعيين نربحهم انا بحكم أن ديك سلعة كتخرج بزاف بمعنى عليها اقبال وفيها مايدار وغالبا داك هامش ديل موزعيين لممكن يربحوه معايا كيخلص ليا حاولي 70% ديل كرا حيت لا عندكم السيارة احسن حاجا تقداو راسكم هاد شي بنسبة تجربتي أما ناس لباغين يبداو بحال هاد مشاريع سواء في اماكن الصيفية ولا طول عام الاهم حاجا هي الموقع كنكرر على الموقع هو الاهم حتا موزعيين لا كان موقع كيتعاملو معاك وكيحطو ليك سلعة فاكتورة بفاكتورة حيت عارفين الموقع مروج وغادي تباع فيه سلعتهم وبنسبة لناس لعندهم محلات ديالهم مزيان ناقص عليهم لكرا لطاجير بحال هادو لعندي كيبداو من 800 درهم مترو وما فوق وكل واحد على حساب شحال عندو ديل ميتراج ف محل ديالو.

والاهم لا كنتي غادي دير بحال هاد محلات وتحط براني راه صعيبة شوية راه يلعبو بيك .انا ف خدمتي لكيكونو ف لاكيس انا وخوتي الحمد لله كاين تقة وخوك معمرو يشفرك وحتا لا هز مغاديش يورك عليك ههه وحتا لا هز راه خوك هاينة غير يكون راجل مهم بحال هاد محلات فيهم مايدار يكدب عليك كداب ولكن هاد شي كيبغي موقع وتقوام والله يسهل على الجميعونسيت واحد حاجا لهي مغامرة نقدر نقوليكم ملي شديت هاد محل بعض ما سولت عليه ودرستو مزيان تسلفت مبلغ 60000 درهم وعاونت ب شيكات ما يقارب 100000 درهم وكانت في جيبي 40000 درهم وتوكلت على الله والحمد الله امور كانت مزيانة

فقرة سؤال و جواب

  • اشناهيا السلعة إلي عليها أكثر إقبال ؟
    – مواد التجميل فيها ميدار
  • شنو المشاريع لخرا لي يمكن تخدم مزيان فالاماكن السياحية!!؟
    – ماكلة سناكات راك عارف بيتزا طاكوس سندويشات
  • السلام خويا بغيت نسولك كفاش تكتكري غي 4 أشهر فالسنة صافي والسلعة ديالك كتبقى نيت فالمحل ومكتخلص والو ولا تا كتسالي سلعتك وتبقى المحل خاوي تالصيف ثاني وبشحال الكرى تقريبا فسر لينا كثر الله ينورك أخويا
    – هاد محلات كيخدمو غير الصيف كنهضر علا تجربتي وكاين محلات لكيخدمو العام كامل ديما كنخدم ف الصيف وملي كيقرب يسالي مكنبقاش نهبط سطوك كنبيع وكنتقدا غير بقياس باش ملي يسالي الصيف نكون بعت سلعتي كاملة ولا بقات ش حاجا قليلة كاين ليجي يشريها من عندك بتمن زوين
  • بشحال تقريبا الكراء ديال محلات بحال هادوك فمكان مروج
    – بتداء من 5000 درهم
  • واش كاع المواد الغدائية كاينين ولا غير المشروبات وبيمو
    – لا كلشي
  • الاشهر الاخرى المحل تيجيب ثمن الكراء واجور العمال ؟
    – خدمت الصيف كتعوض كرا ديل عام كامل وعمال راه كيخذمو معاك غير تلات اشهر كيتخلصو وكيمشيو

شكرا للأخ Mohamed Tarik على المشاركة

إعلان