إعلان


محل بيع مواد التجميل و الماكياج

بزاف ديال الشباب والشابات كيفكرو فبحال هاد المشروع ديال مواد التجميل. اولا المشروع ماشي بسيط المشروع عندو افاق كيطور بسرعة ومع المدة امكن تزيد شحال من حاجة بحال الاكسسورات ديال الهواتف وبيع الهواتف وتزيد الحقائب النسائية والساعات اليدوية وجميع انوع الهدايا وتزيين السيارات وشحال من حاجة تقدر دخلها فنفس المحال. بالنسبة للأرباح الا كنتي غتقدا السلعة من عند ماليها ماشي من سماسريا من كازا مثلا او من ناظور سلعة ديال مليلية او من سبتة او سلعة ديال برا لي الاثمنة ديالها ماشي معروفة راه نسبة الارباح كتوصل حتى %50 فالمنتوج إضافة الى ان الارباح لا بأس بها. الا كانت عندك الحركة مروجة تبيع 2000 درهم فنهار من المحتمل تربح فيها 500 درهم وشي مرات أكثر.

السلبيات : ف مواد التجميل خاصك ديما تراقب التاريخ ديما تجيب سلعة لي كيكون فيها 3 سنوات او أكثر من غير المنتوجات لي كتمشا بزاف ولا كيديرو فيها تاريخ قليل بحال كريمات ديال الشمس مثلا.

الموقع: كيلعب دور كبير فهاد شي ديال كوسميتيك الا معندكش موقع فيها ناس مشيا جايا ولا ف شي قيسارية مشهورة ولا ف شي درب فيه العمارات السكنية بزاف والموظفات ولبنات بكثرة غير حاول تقلب فشي بلاصة خرا.

راس المال : اول سؤال كيسول عليه المقبل على هاد المشروع هو شحال غيخسني ديال فلوس باش نبدا؟؟ والجواب : اكذب عليك شي واحد اقولاك 5 مليون تبدا ولا 3 مليون تبدا الجواب الصريح هو: راسمال عندو علاقة بثمن باش غتكري المحال.. كيفاش ؟؟ انا نفهمك ، الا مثلا تكري ب 500 درهم امكن غير 3 مليون غادي ديماري حيث ديك 500 درهم متأثرش ليك فراسالمال ولكن ميمكنش تبدا بها الا كاري ب 5000 درهم او كثر حيت غادي دوز واحد 3 اشهر وتاكل داك راس المال غير فلكرا ونتا مزال معرفك حتى واحد ومعندكش لكلايان ومزال كتصايب المحال ديالك الخلاصة شحال ما كان لكرا غالي شحال ما خاصك راس المال كتار.الا الواحد عندو المحال ديالو ؟؟ باش تعمر المحال على قاد الحال تجيب غير سلعة لي مطلوبة وكتباع غادي اخصك تقريبا 7 مليون من غير مصاريف التجهيزات بهاد راسالمال تخدم مرتاح واي واحد يسولك عل شي حاجة فمواد التجميل يلقاها عندك.

نقطة اضافية : الا بغيتي تستمر وتضمن الكليان ديالك خاصك بعدا تكون انسان طيب خلوق مأدب منين تجي عندك البنت ركز على بزطامها ماشي على نمرة ديال التلفون عطي الوقت هدر مع البنات دخل فتفاصيل الشخصية ديالها ضحك وهدر بثقة وقرا مزيان على فوائد وطريقة الاستعمال ديال المنتوجات قبل ميجي عندك لكليان باش منين اسولاك مترتبكش فلول حاول دير أثمنة مناسبة متفكرش فالارباح فكر فتشد لكلايان وتهلا فيهم وبالي نتا جيتي من اجلهم ومتفكرش بتاتا انه بعد عام ولا عامين خاصك ترجع راس المال وتبقا تهز الارباح خاصك طور المحل وخدم ساعات اضافية وزيد خدم نهار الاحد باش تزيد السلعة وتعمر المحل حتى توقف على رجليك وتضمن راسك عاد تبقا تهز لفلوس راسك باش دير بهم شي حاجة ماشي ضرورية .

التجارة الالكترونية: متنساش تساعد راسك بالتسويق الالكتروني دير صفحة خاصة بالمحل وبارطاجيها مع صحابك وبقا دير فيها الجديد ديالك طريقة الاستعمال الاثمنة غادي تعاونك بزاف دبا ولا كلشي خدام بالانترنيت. حاجة خرا مهمة: باش تولي متميز ومنفرد عن المنافسين ديالك ديما خاصك تفاجئ الزبناء ديالك مرة مرة خاصك دير التخفيضات والعروض وشي لعبة فيها الهدايا مثلا ولا تبقا دير أثمنة مغرية وتشجع الكليان ديالك وتولفهم المحال، نتا ديما رابح.

نصيحة للبنات: الا كنتي من النوع ديال البنات لي كيستعملو ماكياج بزاف واي حاجة جبتيها المحل خاصك تهزي منها تجربيها راسك هادا عكار الفم هادي كريمة للشعر هادي ريحة للجسم …وزيد وزيد ، الا غديري هاكا غير بدلي عليك هاد الدومين ميصلحش ليك.

إعلان